Longa noite de pedra

Longa noite de pedra (1962) é unha das obras claves para entender a nosa literatura contemporánea: libro emblemático e referencia obrigada de toda unha época e de hoxe. Celso Emilio Ferreiro (Celanova, 1912-Vigo, 1979) acada nestas páxinas algúns dos seus momentos máis intensos, brillantes e conmovedores. A eficacia da comunicación poética, a forza da súa palabra, a autenticidade do sentimento e a procura en cada caso da expresión máis directa e sentida para o corazón humano fan que estes poemas atesouren un valor universal e, á vez, sexan unha crónica intransferible dun tempo decisivo. Este libro de poemas é exemplo da poesía social imperante na época, en tódalas líricas peninsulares. A miseria das clases traballadoras, a emigración, a opresión política, a ansia de liberdade e o antibelicismo maniféstanse a través dunha linguaxe clara e directa, rica en imaxes e símbolos e con recursos que rompen coa linguaxe poética tradicional.